Psa 140 | Alep | STEP | למנצח מזמור לדוד

Psalms 140

1 למנצח מזמור לדוד

2 חלצני יהוה מאדם רע מאיש חמסים תנצרני

3 אשר חשבו רעות בלב כל-יום יגורו מלחמות

4 שננו לשונם כמו-נחש חמת עכשוב—תחת שפתימו סלה

5 שמרני יהוה מידי רשע— מאיש חמסים תנצרני

אשר חשבו לדחות פעמי

6 טמנו גאים פח לי— וחבלים פרשו רשת ליד-מעגל

מקשים שתו-לי סלה

7 אמרתי ליהוה אלי אתה האזינה יהוה קול תחנוני

8 יהוה אדני עז ישועתי סכתה לראשי ביום נשק

9 אל-תתן יהוה מאויי רשע זממו אל-תפק ירומו סלה

10 ראש מסבי— עמל שפתימו יכסומו (יכסימו)

11 ימיטו (ימוטו) עליהם גחלים באש יפלם במהמרות בל-יקומו

12 איש לשון בל-יכון בארץ איש-חמס רע—יצודנו למדחפת

13 ידעת (ידעתי)—כי-יעשה יהוה דין עני משפט אבינים

14 אך צדיקים יודו לשמך ישבו ישרים את-פניך